Tuesday 4 June 2013

జూన్ 4 .. తొమ్మిదేళ్ల క్రితం ఏం జరిగింది?

సునామీలు లేవు. భూకంపాలు లేవు. ప్రపంచం ప్రశాంతంగానే ఉంది. జూన్ 4, ఇదే రోజు, తొమ్మిదేళ్ల క్రితం ఏం జరిగిందో తర్వాత మాట్లాడుకుందాం. అంతకు ముందు రోజు రాత్రి తొమ్మిది గంటలకు మాత్రం ఫిలిమ్‌నగర్ పెద్ద షాక్‌కు గురయింది.

జూబ్లీహిల్స్‌లోని ఒక ప్రముఖ హీరో ఇంట్లో కాల్పులు జరిగాయి. ఒక పెద్ద ప్రొడ్యూసర్, మరొక ప్రముఖ సినిమా సిధ్ధాంతి ఆ కాల్పుల్లో దారుణంగా గాయపడి, చావుబతుకుల మధ్య హాస్పిటల్‌కు తరలించబడ్డారు.

ఆ అగ్ర హీరో పేరు నేను ప్రత్యేకంగా మీకు చెప్పనక్కర్లేదు. ఆ ప్రొడ్యూసర్ పేరు బెల్లంకొండ సురేష్. ముందే చెప్పినట్టు, ఆ రాత్రి జరిగిన ఆ సంఘటన ఇండస్ట్రీకి ఓ పెద్ద షాక్!

కట్ చేస్తే -

జూన్ 4, శుక్రవారం ఉదయం నారాయణగూడలోని వెంకటేష్ థియేటర్లో రాజా హీరోగా నటించిన నా తొలి చిత్రం "కల" విడుదలైంది. నేనీ బ్లాగ్ రాస్తున్న సమయానికి (ఉదయం 9 గంటలు), ఆ రోజు, నా ప్రొడ్యూసర్ మిత్రుడు రామచంద్రారెడ్డి "కల" సినిమా ఫిలిం రీళ్లను చిలుకూరు బాలాజీ టెంపుల్‌కి తీసుకెళ్లాడు. అక్కడ, సంప్రదాయబధ్ధంగా, సినిమా విజయాన్ని కాంక్షిస్తూ పూజ చేయించాక, ఆ రీళ్లని వెంకటేష థియేటర్లో ప్రదర్శనకి తీసుకొచ్చాడు. సినిమా ఫ్లాపయింది.

ఫెయిల్యూర్‌కి వంద రీజన్స్ ఉంటాయి. వాటిని గుర్తుపెట్టుకుని, నన్ను నేను సమర్ధించుకునే ప్రయత్నం చేయటం కంటే మూర్ఖత్వం మరొకటి ఉండదు. అంతిమ ఫలితమే నాకు ముఖ్యం.

రికార్డ్ స్థాయిలో - ఇప్పటివరకు - జెమిని, తేజ చానెల్స్‌లో సుమారు వందసార్లు టెలికాస్ట్ అయిన నా తొలి చిత్రం "కల" అంతిమ ఫలితం కమర్షియల్ ఫెయిల్యూర్. అది మాత్రమే నాకు గుర్తుంటుంది. దాన్ని నేనెప్పుడూ మర్చిపోను.

***

("కల" trivia .. తర్వాతి బ్లాగ్‌లో!)      

No comments:

Post a Comment