ముంబైలో కలిసిన వారణాసి అమ్మాయి!

నరేంద్ర మోదీ నిన్న వారణాసిలో నామినేషన్ వేసినప్పటి వార్తలు చూస్తుంటే, నాకు మొట్టమొదట గుర్తుకొచ్చింది వేరే. అది పూర్తిగా రాజకీయాలతో సంబంధం లేని విషయం.

మోదీ వారణాసిలో ఎలాగూ గెలుస్తాడు. ఆ విషయం వదిలేద్దాం.

కట్ టూ టాపిక్ -    

ముంబై జూహూలోని "సీ సైడ్" హోటల్లో నన్ను కలిసిన ఒక అందమైన అమ్మాయి. ఆ అమ్మాయి పేరు విదిశ. నా రెండో చిత్రం "అలా" కాస్టింగ్ గురించి వెళ్లినప్పుడు ఆడిషన్ కోసం వచ్చిన ఎందరో ఔత్సాహిక హీరోయిన్లలో విదిశ చిట్టచివరగా వచ్చింది. విచిత్రంగా - హీరోయిన్‌గా చివరికి తనే సెలెక్టయ్యింది.

విదిశ వారణాసిలో పుట్టిపెరిగిన అమ్మాయి. "మిస్ వారణాసి" కూడా. వాళ్ల నాన్న వినయ్ శ్రీవాస్తవ ఒక రిటైర్డ్ మిలిటరీ ఆఫీసర్. ఆయనతో నాకు భలే ఫ్రెండ్‌షిప్ ఉండేది. అప్పుడప్పుడూ నా మీద ఏదో డౌట్ కూడా ఉండేది!

"అలా"లో నేను పరిచయం చేసిన విదిశ శ్రీవాస్తవ - తర్వాత చాలా తెలుగు, తమిళ చిత్రాల్లో హీరోయిన్‌గా చేసింది.
ఇ వి వి "అత్తిలి సత్తిబాబు ఎల్ కె జి", "మా ఇద్దరి మధ్యలో", ఇటీవలి శ్రీకాంత్ చిత్రం "దేవరాయ" మొదలైనవి విదిశ తెలుగులో చేసిన కొన్ని చిత్రాలు.

కట్ టూ లేటెస్ట్ హాట్ ఫేవరేట్ - 

రామ్‌గోపాల్ వర్మ "రౌడీ"లో విష్ణు సరసన హీరోయిన్‌గా చేసి, మరో స్టార్ డైరెక్టర్ పూరి జగన్నాథ్ కళ్లల్లో పడిన "శాన్వి" విదిశ సొంత చెల్లెలు.

విదిశ చెల్లెలుగా శాన్వి నాకు ముందునుంచే తెలుసు. అప్పుడు చాలా చిన్నది. హీరోయిన్ అవుతుందనుకోలేదు. అయ్యింది. చెప్పలేం.. నిజంగానే పూరి చిత్రంలో తనకు అవకాశం వస్తే మాత్రం - టాలీవుడ్‌లో శాన్వి ఒక హాట్ ఫేవరేట్ హీరోయిన్ అయితీరుతుంది.