Tuesday 11 March 2014

సినిమా తీయడానికి ఇప్పుడు ఆఫీస్ అవసరం లేదు!

టీమ్ అంతా ఎక్కడ కలిస్తే అదే ఆఫీస్! అది ఇరానీ హోటల్ కావొచ్చు. కాఫీడే కావొచ్చు. సంజీవయ్య పార్క్ కావొచ్చు. నెక్లెస్ రోడ్డు కావొచ్చు. ఐమాక్స్ లాబీలు కావొచ్చు..

ఇదివరకులా కాదిప్పుడు. సినిమా నిర్మాణానికి సంబంధించిన పని ఏదయినా ఇప్పుడు ఊహించని విధంగా సూపర్‌ఫాస్ట్‌గా జరిగిపోతున్న రోజులివి. మొబైల్ టాక్స్, వాట్సాప్, ఫేస్‌బుక్, ఈమెయిల్, స్కైప్ టాక్స్.. ఇలా ప్రతి ఆధునిక సాధనం సినిమా నిర్మాణానికి ఏదోరకంగా ఉపయోగపడుతోంది.

ఇవన్నీ పక్కనపెట్టి ఇదివరకులా "పాత చింతకాయ పచ్చడి" పధ్ధతిలో పని చేయడానికి ఎవరూ ఇష్టపడటంలేదు.

కొత్త నటీనటులు, టెక్నీషియన్ల ఎన్నిక దాదాపు ఆన్‌లైన్ ద్వారానే జరిగిపోతోంది. ఫోటోలు, వీడియో క్లిప్స్ ఆన్‌లైన్లో అందుబాటులో ఉన్నప్పుడు .. ఇంక ప్రత్యేకంగా ముంబై, ఢిల్లీ లకు వెళ్లాల్సిన అవసరమేలేదు. స్క్రీన్‌టెస్టులంటూ వారాలకి వారాలు టైం వేస్ట్ చేయాల్సిన అవసరం అంతకంటే లేదు.

అయితే - వీటి ఆధారంగా షార్ట్ లిస్ట్ చేసుకున్నవాళ్లని చూడ్డానికి మాత్రం ఒక్కసారి మాత్రం డైరెక్ట్ ఆడిషన్ అవసరమౌతోంది. దానికి ఆఫీస్ అవసరం ఎంతమాత్రం లేదన్నది అందరికీ తెలిసిందే.

ఇక కథా చర్చలు, మేకింగ్ ప్లానింగ్స్, అన్నీ కాఫీడేల్లో, నెక్లెస్ రోడ్ చెట్లక్రింద, ఐమాక్స్‌లో, కేబీఆర్ పార్కులో, టాంక్‌బండ్ మీదా.. చక చకా అయిపోతున్నాయి. ఎక్కడా ఎలాంటి ఇబ్బంది లేకుండా చాలా స్మూత్‌గా జరిగిపోతున్నాయి.

కేవలం ఒక్క సినిమా షూటింగ్ సమయంలో మాత్రం ఒక్క నెలపాటు.. ఏ గెస్ట్ హౌజ్ రూమ్‌లోనో, లేదంటే ఓనర్స్ అభ్యంతర పెట్టని .. ఏ బ్యాచిలర్ గదిలోనో, లేదంటే ఓ సింగిల్ బెడ్ రూమ్ పోర్షన్‌లోనో అన్ని ఏర్పాట్లు చేసుకుంటూ ఉపయోగించుకోగలిగితే చాలు.

పోస్ట్ ప్రొడక్షన్‌కి మళ్లీ మామూలే. ఎక్కడ పని జరుగుతోంటే అక్కడ అందరూ వాలిపోతారు అవసరమైన టీమ్ మెంబర్లు. అంతే. ఫైనల్ కాపీ రెడీ!

ఇక బిజినెస్ కోసం అసలు ఆఫీసే అక్కర్లేదు!

సో.. అంతా కాఫీడేలు, ఇరానీ హోటల్లూ, పార్కులు, బ్యాచిలర్ రూముల్లోనే మన "చిన్న సినిమా"లనబడే "ఇండీ సినిమా"ల నిర్మాణం అంతా జరిగిపోతుందన్నమాట!

ఇంతమంచి నేచురల్ లొకేషన్స్‌ని మించిన ఆఫీస్ ఏముంటుంది? ఇలాంటిచోట్ల పనిజరిగినప్పుడే ఆలోచనలు కూడా మెరుపుల్లాంటివి వస్తుంటాయి.

కట్ టూ హాలీవుడ్ "ఇండీ సినిమా" - 

ఇదంతా హాలీవుడ్లో ఎప్పుడో ఉంది. ఇప్పుడూ ఉంది. కేన్స్ వంటి ఫిలిం ఫెస్టివల్స్‌లోనూ, హాలీవుడ్‌లోనూ సంచలనాలు సృష్టించిన "బ్లెయిర్‌విచ్ ప్రాజెక్ట్", "పారానార్మల్ యాక్టివిటీ", "బిఫోర్ సన్‌రైజ్", "ఫర్ లవర్స్ ఓన్లీ", "న్యూలీ వెడ్స్" .. వంటి ఎన్నో ఇండిపెండెంట్ సినిమాలకు వాటి నిర్మాణ సమయంలో ఆఫీసుల్లేవు!

అయితే - ఇక్కడ మనదగ్గర గొప్పలకోసం తపించడమే ఎక్కువగా ఉంటుంది కాబట్టి, ఇదంతా ఎవరూ నమ్మరు. మనవాళ్లకు ఎంతమాత్రం నమ్మశక్యంగా ఉండదు. కానీ, నిజం ఇదే.   

No comments:

Post a Comment